გამარჯობა,
მე გახლავართ გიორგი იაშვილი, შ.პ.ს „ჯეო ნატურალის“ დამფუძნებელი დირექტორი რაჭიდან, პროფესიით ეკონომისტი ვარ თუმცა მიმდინარე საქმიანობა თაფლის წარმოებას უკავშირდება. საქმიანობის გზაზე სასიამოვნოდ მნიშვნელოვანი ეტაპი იყო ევროკავშირის, შვედეთის და ავსტრიის მიერ დაფინანსებულ პროექტ GRETA-თან თანამშრომლობა, რომლის შესახებ ინტერნეტის მეშვეობით შევიტყვე და პირველადი ინფორმაცია იმდენად პერსპექტიულად გამოიყურებოდა, რომ გადავწყვიტე ამ საინტერესო პროექტთან უპირობო თანამშრომლობა. განსაკუთრებით ეს ეხებოდა ბიო მიმართულებაზე გადასვლის ციკლს და მარკეტინგულ აქტივობებს.
რამდენიმე ეტაპის გავლის შემდეგ მხვდა პატივი გავმხდარიყავი საგრანტო პროგრამის მონაწილე და ამის შემდეგ დავიწყეთ იმ ბენეფიტების მიღება, რომლებმაც შეიძლება ითქვას რომ საკმაოდ მნიშვნელოვანი როლი შეასრულა ჩემს სამეწარმეო საქმიანობაში. ეს იყო ძირითადი საშუალებების შეძენა, რომლებიც სასიცოცხლოდ მნიშვნელოვანი იყო: საფუტკრეების დაცვის და მონიტორინგის სისტემები, ელექტრო სასწორი, ვიდეო კამერის და აღრიცხვის სისტემა და ასევე, გარეული ცხოველებისგან დამცავი, რაც მაღალმთიან რეგიონში მუდმივად საჭიროა.
აუცილებლად მინდა ვახსენო მარკეტინგული კუთხით გაწეული დახმარება, რაც ნამდვილად ფასდაუდებელი იყო. პროექტის ფარგლებში სხვადასხვა ტიპის გამოფენებზე და სემინარებზე მივიღეთ მონაწილეობა, მათ შორის უნდა გამოვარჩიო დუბაი ექსპო, სადაც მოგვეცა შესაძლებლობა ქართული პროდუქცია უცხოური ბაზრისთვის გაგვეცნო და პირველი საქმიანი კონტრაქტიც კი დავდეთ. ეს იყო წარმატების რეალური, ხელშესახები შედეგი, რაც ჩვენნაირი მცირე მეწარმეებისთვის დიდი სტიმულია.
საინტერესო და საჭირო იყო ტრენინგებზე გაზიარებული ცოდნა მარკეტინგული კუთხით, ბრენდინგის და ასევე სოციალურ მედიასთან ურთიერთობის ნაწილში მიღებული ინფორმაცია. რაც შეეხება ბიო სერტიფიცირებას, მინდა გითხრათ რომ დანერგვის პროცესში ვართ და სულ მალე მივაღწევთ მიზანს და გვექნება ელკანასგან სერტიფიკატი, რაც უფრო და უფრო მეტ გზას გაუხსნის ჩვენს საქმიანობას.
სწორედ ამ ზემოთ ჩამოთვლილთაგან გამომდინარეობს ჩვენი სამომავლო გეგმებიც, რომელიც უცხოური ბაზრის ათვისებას ემსახურება და გვაქვს სურვილი სრულყოფილად შევძლოთ მაღალი ხარისხის საექსპორტო ბიო თაფლის გატანა საზღვარგარეთ.
დასასრულს მინდა ვთქვა რომ მსგავსი პროექტები სასიცოცხლოდ აუცილებელია მეწარმეებისთვის, რაც მთავარია ეს არის რეალური შესაძლებლობა და სხვა მეწარმეებს ვურჩევდი რომ იქონიონ სწორი მიზნები და აუცილებლად ჩაერთონ. საკუთარ გამოცდილებაზე დაყრდნობით ვიტყოდი, რომ წარმატებისთვის აუცილებელია სწორი დაგეგმვა, სწორი ბიზნეს გეგმის შედგენა, სწორი ანალიზი და სამეწარმეო საქმიანობის ფართო პერსპექტივაში დანახვა.
პერსპექტივებზე და სხვა გეგმების განსახორციელებლად მზად ვართ ვითანამშრომლოთ სხვა მსგავს ინიციატივებთან თუ საგრანტო პროგრამებთან და დაინტერესების შემთხვევაში ღია ვართ საკომუნიკაციოდ, ტელეფონის: 599212030, ელ-ფოსტის: info@geonatural.ge და ასევე ვებ-გვერდი https://geonatural.ge საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის